Testing 4

SINGAPORE MUNGDAN DU JINGHPAW WUNPAWNG KANAWN MAZUM HPAWNG A LABAU KADUN

Anhte a Jinghpaw Wunpawng share shagan kaji kawa ni gaw No.(1) majan hta english hpyen la magam gun nna, masawp amya ga (Mesopotamia) de du hkra majan gasat ai lam chye lu ai. Masawp amya ga kaw, majan padang dip la ngut nna, anhte a mungdan de bai nhtang wa ai shaloi Sing Gat Pawt ( ya Singapore, Moi gaw Malaysia zinlawng ) kaw mung shang da ai lam, nkau mi gaw, Singapore sentosa zinlawng dap nu kaba ( South East Asia Fort ) kaw mung hpyen magam gun let nga lai wa sai lam chye lu ai.

Singapore zinlawng gaw 1965 ning hta Malaysia mung dan kaw na hting bren pru wa ai mung dan kaji langai rai tim, mung kan hta No.(2) san seng dik ai hte tsit lali tsawm dik ai mungdan rai nga ai. 1977 ning Jinghpaw Wunpawng sha ni a latsa ning hpring Jaw Poi ngut ai hpang Karai Kasang a shaman chyeju lu ga ai majaw, Jiwoi, Jiwa ni du kau da lai sai Singapore de, Karai Kasang a magam gun chyum hpaji, sut masa, mungkan hpaji hte lam amyu myu hku du sa wa lu saga ai. Ning rai du sa wa ai hta shawng nnan Dr Gam She gaw Trinity Theological College kaw 6shrin Sara kaba galaw lai wa sai. Sharin Sara galaw nga let Singapore du Myen Hkristan naw ku hpawng (SBCF) hpe woi hpaw hpang wa sai. Ya dai ni gaw Judson Hka Lup nawku hpung rai nga sai.

Sang hpaw engineer kaba (Ship superintendent hte Captain) hte kaga magam gun law law mung nga lai wa masai. 1994 August 15th ya shana 5:00pm hta Far Eastern Bibble College jawng wang kata kaw Chyum jawng ma Kareng Bawn Awn , Lazum Lung Wa, Hpung Raw Hpung Seng ni hte Singapore Jinghpaw Wunpawng sha ni hkrum zup let Singapore Jinghpaw Wunpawng Kanawn Mazum Hpawng hpe hpawng hpang wa nna, shata mi hta kalang (Second Week) laban shana de 5:00pm hta lu ai shara kaw, jawm kahkyin la nna, naw ku lai wa sai. Dai ten hta chyum jawng ma Kareng Bawm Awn (BD) hte tsi saranum Hkawn Sar yen woi awn lai wa sai. Lani hte lani Singapore de du sa ai Jinghpaw Wunpawng myu sha ni du shang wa masha law jat wa sai majaw 1995 October 9th ya shani shadang Sumlut Gum Tu nga ai (Blk 38, # 20-2406 Upper Boon Keng Road) nta kaw shana de 8:00pm hta Singapore Jinghpaw Wunpawng Hkristan Kanawn Mazum Hpawng komiti hpe hkrang hte hkrak lata san da let hpaw hpang wa lu sai. Ndai komiti hpaw la lu hkra, Nawng Nang Kachin Theological College kaw na Sara Kaba Rev Lahi Naw La (Master of Theology) jawng ma Saranum Maran Roi Zin (BD jawng ma) ni hku na myit sharawt woi awn let hpaw hpang la lu ai re.

Dai ten hta laili laika hte htung hking komiti hpe gaw Hkristan kanawn mazum hpawng a sub- komiti langai mi hku tawn da ai rai ti mung, Pasaris de shing gan kanawn mazum hpawng shani yawng myit hkrum daw dan let, laili laika hte htung hking komiti kaw hpung magam gun Sara ni hku nna woi awn ai lamang kaw n lawm u ga ngu lak san hpaw nhtan da sai. Ndai komiti a mu gun ten gaw (1995 Oct 9th - 1996 Dec 15th) du hkra re. Lahkawng lang ngu na mu gun lata hpawng hpe 1997 January 12th ya shana de 5:00pm hta Sara Pawlu hte Saranum Maran Roi Zin yan a nta (River Valley Hostel) hta galaw la lu sai. Dai shani kaw nna Singapore Jinghpaw Wunpawng Hkristan Kanawn Mazum Hpung hpe Singapore Jinghpaw Wunpawng Hkristan Kanawn Mazum Hpawng ngu galai shamying da sai.

1998 ning na Jinghpaw Wunpawng Hkristan Kanawn Mazum Hpawng komiti nnan hpe Church of The True Light (25 G Perrak Road) kaw 1998 December 11th ya shani lata san da lu sai. 1998 June 12th Sara Galau Zau Htun woi awn lit hkam let nawku mahkawn buk (Hymn Book) hpe galaw da lu sai. Dai shaning October shata 15th ya hta Singapore du Jinghpaw Wunpawng sha ni a sut hpung hpaw hpang lu na matu zuphpawng galaw lai wa sai. 1999 ning na mu gun komiti nnan hpe Grace Baptist Church kaw 19998 December 12th ya shani lata san da lu sai. 1999 March 5th ya shani kaw nna shata mi hta (2) lang (second & forth week) hta naw ku hpawng galaw hpang wa lu sai. 1999 June 6th ya hta Rev. Lahi Naw La Woi Awn let Singapore Jinghpaw Wunpawng Hkristan Kanawn Mazum Hpawng a Gaw Da Ai Tara ka lajang hpang wa sai.

1999 july shata kaw na December shata du hkra woi awn ai Sara ni n ngai ai rai tim, komiti ni woi awn let nau ku daw jau lai wa sai. Jawng sa lung ai Sara ni ma hkra wa mat ai hpang 1999December 27th ya hta Moh Nyin Mare Anglican hpung kaw na Sara Kum Gyi Naw Awng hpe anhte a Sara tai let (Master of Divinity) chyum hpaji hpe sharin la na matu Saranum Pastor Catherine Chua lit hkam nna shaga da ya sai. 2000 ning na mu gun nnan hpe Bethesda Chapel kaw 1999 November 11th ya shani hta lata san da lu sai. Laili Laika Hte Htung Hking komiti gaw, jau jau kaw na mung nga ai lam chye lu ai rai ti mung tara shang masat (report) nmu lu ai. Rai tim 1996 December 25th ya shana Sara Kareng Bawm Awn hte Rev Zau Li woi awn nna, bai gram hpaw nhtan lu sai.

Naw Ku Lai Wa Sai Shara Ni
(1) Far Eastern College
(2) Bedok Brethren Church
(3) River Valley Hostel, 303 River Valley Road
(4) Church of The True Light, 25 Perak Road
(5) Grace Baptist Church, Matta Road
(6) Bethesda Chapel, 27 lorong Melayu. Dai ni du hkra Bethesda Chapel kaw naw ku nga ga ai.


HOMEPAGE